Røysaleiteveven

Styret har valgt å satse på tenestene Spond som informasjonskanal for grendalaget framover. I tillegg kjem vi som før til å bruke postkassene, og vil vere på Facebook. Dette betyr imidlertid at vi legg ned bloggen vår, Røysaleiteveven. Takk for følgjet så langt, og håpar du vil følgje oss vidare på Spond. Du kan bli medlem her: https://group.spond.com/ASCTC (lenke til Spond)

Takk for ein hyggeleg dugnad på fellesarealet i Nilstræet!

Vi fekk malt dokkestova, rydda godt i vegetasjonen rundt på fellesarealet, rakt og jammna ut underlaget på fotballbana etter vinterens brøyting, olja laftesettet til ungane – og ikkje minst fekk vi smake på ein skikkeleg god gelé-bjørn!

Takk for bidraga, alle de som deltok! 🙂

For ei feiring vi hadde i går! Takk til alle som møtte opp 🙂

Høgtidleg snorklipping, fotballkake, bollar, kaffi og saft – for ei stemning det var!

No ser vi fram til mykje moro og hyggelege hauststunder i grendalaget vårt.

Over 30 naboar var samla til grilling, postløp og bål på sjølvaste jonsokafta.

På Nilstræet myldra det av glade ungar med is og ketchup rundt truten og pratsame vaksne. Det var så kjekt å få samlast slik til hygge og leik på vår tradisjonelle jonsokfeiring i grendalaget. Ekstra kjekt at vi fekk tenne bålet. Jammen fekk vi pressedekning i Sogn Avis også.

Her er nokre bilete frå feiringa:

Takk til alle som bidro på dugnaden på torsdag. Vi vart ein god gjeng på sjølve dugnadsdagen, og fleire ville fullføre påbegynte prosjekt i dagane etterpå.

Leikeplassane fekk ein skikkeleg kickstart på vår- og sommarsesongen 🙂 Benkeborda på Stytti og Nilstræet fekk ein grundig gjennomgang med pussemaskin og beis. Lavvoen fekk ein real vårvask. Dokkestova i Dalhjellevegen fekk eit løft med målekost og pynt. Elles vart det rydda kvist og kvast.

Håpar vi sjåast masse i det flotte grendalaget vårt utover våren og sommaren! Her er nokre bilete:

Styret i grendalaget har konstituert seg. Vi har stokka om på nokre rollar, og har ny kasserar på plass.

Styret i Røysaleite grendalag ser slik ut:

• Linn Sofie Ugulen – leiar – tlf. 950 23 101
• Sindre Børsheim Ramung – nestleiar
• Gisle Njøs Storøstevik – kasserar
• Mari Johansen Aune – skrivar
• Ruthild Dale – vara
• Hilde Katrine Engeli – vara

Vi blir glade for alle innspel og innsats for nærområdet vårt!

For første gong blei årsmøtet halde digitalt. 9 røysaleitingar deltok på møtet frå kvar sine maskiner. Fleire saker vart handsama, mellom anna handlingsplan for 2021:

Handlingsplan 2021:

• Ballplass – årsmøtet ønskjer å ruste opp dekket, skal vere enkelt å vedlikehalde. Halde konstruksjonen på eit minimum, og vurdere heller ballnett på sikt. Må vere mogleg med alternativ bruk.
• Leggje til rette for vekst av eng på områder vi ikkje treng å nytte til anna.
• Brunsnegleaksjon 2.0 – prøver igjen i år. Var problem med leveransar i fjor. Viktig med låg terskel, få mange med.
• Forslag om spleiselag for kommunen – grendalaget betalar lykt, kabling, etc. og kommunen står for straum og forskriftsmessig oppsett. Vurdere eventuell plassering. Avvente svar frå kommunen.
• Opprusting leikeplassar Stytti og Nilstræet. Rydde vegetasjon.
• Leggje til rette for eldre ungar – laftestokkar, byggjesett eller liknande. Elles vere ope for at ungane kan vere kreative, lage hytter og liknande.
• Landskapspleie og rydding på fellesareal.

Tiltak på handlingsplanen er med atterhald om dugnadsinnsats og budsjettdekning.